Ariannu

Mae denu arian, dod o hyd i arian a’i gynnal yn broblem gyffredin y mae sawl menter yn ei hwynebu wrth geisio sefydlu prosiect. Gall arian atodol hefyd fod yn broblem sylweddol i brosiectau sefydledig

Mae’r dudalen hon yn cynnwys gwybodaeth am ffynonellau cyllid sy’n cynnwys maeth a gweithgaredd corfforol a’r rhai sydd wedi eu hanelu at faeth neu at weithgaredd corfforol.

Mae’r wybodaeth yn cynnwys manylion cyswllt, beth sy’n cael ei ariannu a faint y gellir gwneud cais amdano.

Gall siarad â phrosiectau eraill sy’n rhedeg prosiectau tebyg mewn meysydd eraill fod o gymorth mawr, maent eisoes wedi bod drwy’r broses ac maent yn aml yn barod iawn i rannu eu profiadau. Ewch i gronfa ddata y mentrau bwyd cymunedol a chronfa ddata arferion addawol. Mae adran ar y dudalen hon lle y gall partneriaid rannu gwybodaeth am y cronfeydd y maent wedi eu defnyddio a’u profiadau.

Mae ffynonellau ariannu ar ffurf tabl cryno y gellir ei lawrlwytho yma.  

Cronfa Grantiau Bach Mynd i’r Afael â Thlodi

Mae’r Gronfa Grantiau Bach Mynd i’r Afael â Thlodi ar gael i sefydliadau ar draws Cymru. Mae’r Gronfa newydd yn ymgorffori Cronfa Ymddiriedolaeth Cymunedau yn Gyntaf a'r cynllun grantiau bach a oedd ar gael yn flaenorol trwy’r Rhaglen Cyfleusterau a Gweithgareddau Cymunedol (CFAP).

Bydd angen i’r ymgeiswyr ddangos sut y mae’r cynnig yn berthnasol i agenda Dlodi Llywodraeth Cymru a chadarnhau mai’r prif fuddiolwyr yn bennaf yw’r bobl sydd angen cymorth fwyaf.

Bydd y cyllid grant newydd hwn ar gael o fis Ebrill 2013 ymlaen.

Cynllun Grantiau Sector Gwirfoddol Her Iechyd Cymru 2013-2015

• Hybu ffordd iachach o fyw i fenywod beichiog er mwyn cael effaith gadarnhaol arnynt hwy ac ar iechyd eu teulu.
• Annog a chefnogi unigolion i fyw bywydau iach trwy annog gweithgarwch corfforol a deiet cytbwys a rhybuddio pobl rhag ymddygiad peryglus, megis smygu a goryfed, a hynny er mwyn gostwng nifer y rhai sydd mewn perygl o glefydau cardiofasgwlaidd (gan gynnwys clefyd coronaidd y galon a strôc), canser a diabetes.
• Rhoi cefnogaeth i greu menter ysbytai iach neu fenter colegau a phrifysgolion iach.
• Annog a chefnogi cyflogwyr i ddatblygu a gweithredu polisïau ynglŷn â materion penodol yn ymwneud ag iechyd sydd yn y Safon Iechyd Corfforaethol a Gwobr Iechyd y Gweithle Bychan, a/neu faterion cydraddoldeb, megis cam-drin domestig ac iechyd meddwl, a hynny er mwyn cefnogi staff, mynd i’r afael ag absenoldeb salwch a chadw swyddi.

Bydd dwy gam i’r broses geisiadau. Bydd Cam 1 yn derbyn manylion craidd y prosiectau a gynigir, fel bod y Panel Asesu yn gallu cynnal gwerthusiad cychwynnol a dethol prosiectau i fynd ymlaen i Gam 2. Gofynnir i’r prosiectau a fydd yn cael eu dethol i fynd ymlaen i’r ail gam roi disgrifiad manwl o’u prosiectau ar ffurflen gais Cam 2.  

I gael cyngor ac atebion i ymholiadau cyffredinol, cysylltwch â:
Lisa Bishop
Ffôn: 029 20826720
E-bost: HPVSGS@Wales.GSI.Gov.UK  

Neu

Gareth Davies
Ffôn: 029 2082 6730
E-bost: HPVSGS@Wales.GSI.Gov.UK  

Cyllid BBC Plant mewn Angen

Mae BBC Plant mewn Angen yn dyfarnu grantiau ar gyfer plant a phobl ifanc 18 oed ac iau sydd yn profi anfantais trwy:
• Salwch, trallod, cam-drin neu esgeulustod
• Unrhyw fath o anabledd
• Anawsterau ymddygiadol neu seicolegol
• Byw mewn tlodi neu sefyllfaoedd o amddifadedd

Cyllid craidd a hyfforddiant am ddim ar gyfer elusennau iechyd – Gwobrau IMPACT 2013 GSK

Cafodd Gwobrau IMPACT 2013 GSK eu lansio ar 2 Gorffennaf. Mae Gwobrau IMPACT yn darparu cyllid a hyfforddiant arweinyddiaeth am ddim i elusennau iechyd yn y DU gydag incwm o dan £1.5 million.

Mae Gwobrau IMPACT GSK wedi eu cynllunio i wobrwyo elusennau sy’n gwneud gwaith rhagorol i wella iechyd pobl. Mae’n rhaid i’r sefydliadau fod yn dair blwydd oed o leiaf, yn gweithio ym maes iechyd yn y DU gydag incwm rhwng £10,000 a £1.5 miliwn. 

Mae mwy o wybodaeth ar gael ar y wefan (saesneg yn unig).

Sported.

Cafodd ‘Sported.’ ei lansio yng Nghymru ar 8 Tachwedd 2012 ac mae’n addo cefnogi sefydliadau chwaraeon cymunedol ac ar lawr gwlad a sicrhau bod Cymru’n rhan o etifeddiaeth barhaus y Gemau Olympaidd.

Cyllid Parciau i Bobl

Mae Cronfa Dreftadaeth y Loteri (HLF) a’r Gronfa Loteri Fawr (BIG) wedi cyhoeddi y byddant yn buddsoddi £100miliwn mewn parciau cyhoeddus ar draws y DU dros y tair blynedd nesaf.

Nod y rhaglen Parciau i Bobl ar ei newydd wedd yw cael pobl i gymryd mwy o ran yn y gwaith o reoli eu parciau. Mae’r rhaglen hefyd wedi cael ei symleiddio er mwyn i awdurdodau lleol, ymddiriedolaethau cymunedol a grwpiau cyfeillion allu cael gafael ar gyllid mewn ffordd symlach. Bydd y grantiau’n amrywio o £100,000 i £5miliwn.
Gwneir y penderfyniadau ddwywaith y flwyddyn: 31 Awst ar gyfer penderfyniad ym mis Rhagfyr a 28 Chwefror ar gyfer penderfyniad ym mis Mehefin.

Cyllid Splash

Mae cronfa Splash yn darparu cyllid i wella mynediad diogel a chyfrifol i ddŵr ac yn ystyried anghenion yr amgylchedd a grwpiau gwahanol o bobl.

Sefydlwyd y gronfa yn 2008 i gynyddu gweithgareddau hamdden cyfrifol ar ddyfrffyrdd mewndirol, afonydd, llynnoedd a chronfeydd dŵr.

Caiff ei reoli gan Asiantaeth yr Amgylchedd Cymru ac mae’n darparu cyllid i sefydliadau cyhoeddus, preifat a sefydliadau’r trydydd sector (gwirfoddol).

Sefydliad Swimathon yw’r elusen y tu ôl i ddigwyddiad nofio mwyaf y byd ar gyfer codi arian. Mae’r Sefydliad yn cynnig grantiau i sefydliadau ac unigolion sy’n darparu ac yn hyrwyddo gweithgareddau nofio yn eu cymuned leol.

Ymddiriedolaeth Wellcome 

Mae Ymddiriedolaeth Wellcome yn chwilio am brosiectau cyffrous, arloesol ac uchelgeisiol ym maes ymgysylltu â’r cyhoedd sy’n dangos sut mae gwyddoniaeth yn gweithio. Mae hyn yn cynnwys (ond nid yw’n gyfyngedig i) y themâu canlynol: meddygaeth, ffisioleg, seicoleg, maeth, geneteg, esblygiad, diwylliant, cymdeithaseg, economeg, hanes, moeseg ac iechyd y cyhoedd. Mae’r Gwobrau Cymdeithas yn symiau dros £30 000, am uchafswm o dair blynedd. Mae’r cynllun yn agored i unrhyw un â syniad da ar gyfer ymgysylltu pobl â datblygiadau mewn gwyddoniaeth fiofeddygol. Gallai hyn gynnwys: cyfryngwyr ac ymarferwyr cyfathrebu gwyddonol; addysgwyr; gweithwyr iechyd proffesiynol; ac academyddion. Am fwy o wybodaeth ewch i wefan Ymddiriedolaeth Wellcome.

Ymddiriedolaeth Elusennol Stadiwm y Mileniwm yn Gwahodd Ceisiadau gan Sefydliadau Cenedlaethol

Mae Ymddiriedolaeth Elusennol Stadiwm y Mileniwm yn gweithredu tri chylch ymgeisio'r flwyddyn, un yr un gan sefydliadau lleol, rhanbarthol a chenedlaethol. Gwahoddir ceisiadau nawr gan sefydliadau sydd yn cynnwys Cymru gyfan ac yn gweithredu yn y rhan fwyaf o siroedd.

Mae sefydliadau cymwys yn cynnwys rhai di-elw, sefydliadau elusennol a gyfansoddwyd, grwpiau gwirfoddol a sefydliadau elusennol. Mae grantiau hyd at £12,500 ar gael ar gyfer chwaraeon, y celfyddydau, y gymuned a’r amgylchedd. Am fwy o wybodaeth ewch i www.millenniumstadiumtrust.co.uk.  

Porth Cyllid Trydydd Sector Cymru

Mae Cyngor Gweithredu Gwirfoddol Cymru (CGGC) wedi lansio adnodd ar-lein newydd a fydd yn helpu grwpiau gwirfoddol i gael mynediad i’r wybodaeth ddiweddaraf am adnoddau cyllid.

Mae Porth Cyllid Trydydd Sector Cymru yn darparu cyngor a chyfleoedd cyllid a gellir cael mynediad iddo trwy ymweld â gwefan Cyllid Cynaliadwy Cymru CGGC.

Mae’r Porth cyllid yn rhoi mynediad i gronfa ddata y gellir ei chwilio o dros 4,000 o gyfleoedd cyllid, cyngor a chymorth yn y DU ar godi arian ac awgrymiadau ynghylch sut i arallgyfeirio cyllid. Mae’r porth cyllid yn adnodd newydd sbon ar gyfer sefydliadau trydydd sector yng Nghymru ac mae wedi ei ariannu gan Lywodraeth Cynulliad Cymru.

Ceir manylion yr opsiynau ariannu a chyllid sydd ar gael i’r sector, yn cynnwys grantiau, rhoi, cyllid benthyciadau ac ennill incwm trwy gontractau a masnachu. Ceir hefyd yr wybodaeth ddiweddaraf ar gyfleoedd cyllid a thendro ac o ble i gael mwy o gymorth a chefnogaeth.

Mae’r porth cyllid wedi ei gynllunio a’i ddatblygu gan dîm Cyllid Cynaliadwy Cymru (SFC) CGGC. Ariennir prosiect SFC gan y Loteri Fawr yng Nghymru ac mae wedi bod ar flaen y gad yn galluogi trydydd sector Cymru i ddod yn fwy cynaliadwy yn ariannol ers bron tair blynedd. Mae SFC yn rhoi’r sgiliau a’r wybodaeth i’r sector i arallgyfeirio ei gymysgedd o gyllid a gweithio tuag at gynaliadwyedd ariannol hirdymor.

I gael mynediad i’r porth cyllid ewch i www.sustainablefundingcymru.org.uk.  

Sefydliad Pfizer UK

Sefydlwyd Sefydliad Pfizer UK yn 2005 i fynd i’r afael ag anghydraddoldebau iechyd ar draws y DU yn deillio o ffactorau cymdeithasol, economaidd, diwylliannol a demograffig. Mae’n cefnogi prosiectau yn y gymuned sy’n mynd i’r afael ag anghydraddoldebau iechyd yng Nghymru, Lloegr, yr Alban a Gogledd Iwerddon, sydd y tu hwnt i gyllid statudol craidd y GIG. Y nod yw cefnogi prosiectau sy’n darparu atebion arloesol, wedi eu teilwra, cymedrol a lleol i anghenion a ddiffinnir gan arbenigwyr gofal iechyd a gofal cymdeithasol lleol, grwpiau cymunedol ac elusennau.

Asesir y ceisiadau dair gwaith y flwyddyn a chynigir grantiau rhwng £3,000 a £50,000.

Am fwy o wybodaeth anfonwch ebost at pfizerukfoundation@pfizer.com neu ffoniwch 01737 330713 neu ewch i wefan Sefydliad Pfizer UK.

GwirVol a Gemau Stryd yn lansio grantiau chwaraeon

Caiff cynllun grantiau Gemau Stryd newydd GwirVol ei reoli gan Gyngor Gweithredu Gwirfoddol Cymru (CGGC), a chaiff ei gefnogi gan Chwaraeon Cymru a Gwirfoddolwyr y Mileniwm. Cafodd y cynllun ei lansio yn y Senedd gan Brif Weinidog Cymru, Carwyn Jones, ar ddydd Mercher 26 Mai yng Ngwobrau Gwirfoddolwr y Flwyddyn Gemau Stryd y Co-operative 2010. Mae’r grantiau o hyd at £2,000 yr un wedi eu cynllunio i helpu i ddatblygu rhaglenni chwaraeon strwythuredig mewn cymunedau difreintiedig trwy gynnwys pobl ifanc rhwng 16-25 oed fel gwirfoddolwyr. Mae cyllid prosiect o hyd at £2,000 y prosiect ar gael. Am fwy o wybodaeth ac i ganfod sut i wneud cais am grantiau Gemau Stryd GwirVol, ewch i www.GwirVol.org neu cysylltwch â Caro Wild yn Gemau Stryd caro.wild@streetgames.org.  
Am fwy o wybodaeth cysylltwch â Lynne Reynolds ar 029 2043 1718, Jackie Huybs ar 01495 790212/ 07814 070239 neu Leah Doherty ar 029 2043 1763.

Dewch i Gerdded Cymru

Y Gronfa Loteri Fawr - Arian i Bawb

Cyllid ar gael ar gyfer cymunedau gan Sefydliad Lloyds TSB

Mae Sefydliad Lloyds TSB yn cynnig cyllid ar gyfer cymunedau yng Nghymru.

Mae’r rhaglen Gymunedol yn canolbwyntio ar waith craidd cyllid sydd yn helpu plant difreintiedig i chwarae rôl lawnach yn y gymuned mewn un o’r ffyrdd canlynol:
• Cyfranogiad cymdeithasol a chymunedol gwell
• Dewisiadau a chyfleoedd gwell mewn bywyd
• Helpu pobl i gael eu clywed.

I ganfod mwy am y cyllid cliciwch ar wefan Sefydliad Lloyds TSB.

Caiff yr adran hon ei diweddaru wrth i ffynonellau newydd ddod ar gael. Os ydych yn ymwybodol o adnoddau eraill nad ydynt yn y tabl cysylltwch â Thîm y Prosiect.